एक जोडि हाति कतार सरकार लाई उपहार आज कतार पठाईयाे

7 days ago

पुस २गते ✍️ होप अनलाईन मिडिया

नेपाल र कतारबीचको प्रगाढ कूटनीतिक सम्बन्धलाई थप मजबुत बनाउने उद्देश्यका साथ नेपाल सरकारले उपहारस्वरूप पठाएका ‘रुद्रकली’ र ‘खगेन्द्रप्रसाद’ नामक एक जोडी हात्ती बुधबार कतार प्रस्थान गरेका छन्। भैरहवास्थित गौतमबुद्ध अन्तर्राष्ट्रिय विमानस्थलबाट कतार एयरवेजको विशेष कार्गो विमानमार्फत यी हात्तीलाई दोहा पुर्‍याइएको हो।

नेपालको इतिहासमा वन्यजन्तु कूटनीति अन्तर्गत गैँडा, रेड पाण्डा र चराचुरुङ्गी उपहार दिने चलन रहे तापनि हात्ती नै उपहार पठाइएको यो पहिलो अवसर हो। यी दुवै हात्ती चितवन राष्ट्रिय निकुञ्जको खोरसारस्थित हात्ती प्रजनन् तथा तालिम केन्द्रमा जन्मिएर हुर्किएका हुन्।

स्थानान्तरण प्रक्रिया र व्यवस्थापन

हात्तीलाई कतार पठाउनुअघि सबै कानुनी र प्राविधिक प्रक्रियाहरू पूरा गरिएको थियो। राष्ट्रिय निकुञ्ज तथा वन्यजन्तु संरक्षण विभागका अनुसार वन्यजन्तुसम्बन्धी अन्तर्राष्ट्रिय कानुन (CITES) र नेपालको प्रचलित कानुनबमोजिम स्वास्थ्य तथा ढुवानी प्रमाणपत्र जारी गरिएको थियो।

हात्तीको नयाँ बासस्थान कतारको अलखोर पार्कस्थित चिडियाखाना हुनेछ। त्यहाँको वातावरण र व्यवस्थापकीय पक्षको पहिले नै नेपाली प्राविधिक टोलीले अध्ययन गरिसकेको छ। हात्तीका साथमा उनीहरूको तत्कालको रेखदेख र खानपानका लागि एकजना पशु प्राविधिक र दुईजना अनुभवी माहुते पनि कतार गएका छन्। उनीहरूले त्यहाँ एक महिना बसेर स्थानीय कर्मचारीहरूलाई हात्तीको व्यवहार र स्याहारबारे तालिम दिनेछन्।

पृष्ठभूमि र कूटनीतिक महत्व

यस उपहारको योजना २०७५ सालमा तत्कालीन राष्ट्रपति विद्यादेवी भण्डारीको कतार भ्रमणका क्रममा तय भएको थियो। पछि, २०८१ वैशाखमा कतारका अमिर शेख तामिम बिन हमाद अल थानीले गरेको ऐतिहासिक नेपाल भ्रमणका अवसरमा राष्ट्रपति रामचन्द्र पौडेलले सो प्रतिबद्धतालाई औपचारिकता दिँदै हात्ती उपहार दिने घोषणा गरेका थिए।

मन्त्रिपरिषद्को २०८१ कात्तिक २ गतेको निर्णयअनुसार यी हात्तीलाई ‘नेपाली जनताको सद्भावको प्रतीक’ का रूपमा हस्तान्तरण गरिएको हो। विमानस्थलमा बिदाइका क्रममा वन मन्त्रालयका सचिव डा. राजेन्द्र प्रसाद मिश्र, विभागका महानिर्देशक डा. वुद्धिसागर पौडेल, कतारी राजदूत र सुरक्षा निकायका प्रमुखहरूको उपस्थिति रहेको थियो।

यो कदमले नेपाल र कतारबीचको द्विपक्षीय सम्बन्धलाई केवल श्रम र व्यापारमा मात्र सीमित नराखी वातावरणीय र जैविक विविधता संरक्षणको क्षेत्रमा पनि नयाँ उचाइमा पुर्‍याएको विश्वास गरिएको छ।