पोखरा मा पुस १३गते देखि १७गते सम्म पोखरा सडक महोत्सव हुदै

2 months ago

पुस २गते ✍️ होप अनलाईन मिडिया

पर्यटकीय नगरी पोखराको लेकसाइडमा आगामी पुस १३ गतेदेखि २७औँ संस्करणको ‘पोखरा सडक महोत्सव २०८२’ आयोजना हुने भएको छ। रेस्टुरेन्ट एन्ड बार एसोसिएसन नेपाल (रेबान) पोखराको आयोजनामा हुने यो महोत्सव पुस १७ गतेसम्म सञ्चालन हुनेछ।

बुधबार राजधानीमा आयोजित पत्रकार सम्मेलनमा रेबान पोखराका अध्यक्ष विश्वराज पौडेलले विगत २६ वर्षदेखिको निरन्तरतालाई कायम राख्दै यस वर्ष थप उत्साहका साथ महोत्सव गर्न लागिएको जानकारी दिनुभयो। अंग्रेजी नयाँ वर्षको स्वागतार्थ आयोजना गरिने यो महोत्सवले पोखराको आन्तरिक तथा बाह्य पर्यटन प्रवर्द्धनमा टेवा पुऱ्याउने विश्वास गरिएको छ।

महोत्सवका मुख्य आकर्षणहरू:

• सांस्कृतिक विविधता: नेपालका विभिन्न जातजातिका लोपोन्मुख सांस्कृतिक झाँकी, मौलिक भेषभूषा र परम्परागत नृत्यको भव्य प्रदर्शनी।

• परिकारको स्वाद: ‘सडकमै खाऔँ, सडकमै रमाऔँ’ भन्ने नाराका साथ साढे तीन किलोमिटर क्षेत्रमा राष्ट्रिय तथा अन्तर्राष्ट्रिय स्वादका परिकारहरूको स्टल।

• मनोरञ्जन: चर्चित राष्ट्रिय कलाकारहरूको लाइभ कन्सर्ट र मौलिक लोकदोहोरी प्रस्तुति।

• खेलकुद तथा साहसिक गतिविधि: फेवातालमा बोट रेस, रस्साकस्सी र पर्यटक लक्षित विशेष खेलहरू।

रेबानका केन्द्रीय अध्यक्ष संघर्ष विष्टले सुस्ताएको आर्थिक गतिविधिलाई चलायमान बनाउन यस्ता मेला महोत्सवको ठुलो महत्त्व रहने उल्लेख गर्दै सबैलाई सहयोगका लागि अपिल गर्नुभयो।

यस पटक महोत्सवमा मनोरञ्जन मात्र नभई पोखराको पर्यटनका अवसर र चुनौतीबारे विज्ञसँग ‘टक शो’, पर्यटकीय वृत्तचित्र प्रदर्शन र फोटो प्रदर्शनी समेत हुने रेबान पोखराका पूर्व अध्यक्ष नरेश भट्टराईले जानकारी दिनुभयो। अंग्रेजी नयाँ वर्ष मनाउन पोखरा पुग्ने पर्यटकका लागि यो महोत्सव एक अविस्मरणीय गन्तव्य बन्ने आयोजकको दाबी छ।