प्रतिनिधिसभा सदस्य निर्वाचनलाई लक्षित गर्दै निर्वाचन आचारसंहिता, आज मध्यरातदेखि लागू हुने

2 weeks ago

माघ ४गते :✍️ होप अनलाईन मिडिया

आगामी फागुन २१ गते तय भएको प्रतिनिधिसभा सदस्य निर्वाचनलाई लक्षित गर्दै निर्वाचन आचारसंहिता, २०८२ आज मध्यरातदेखि लागू हुने भएको छ।

निर्वाचन आयोगको आज बसेको बैठकले आचारसंहिता कार्यान्वयन गर्ने निर्णय गरेको हो। आयोगका सहायक प्रवक्ता कुलबहादुर जिसीका अनुसार निर्वाचनलाई स्वतन्त्र, निष्पक्ष, स्वच्छ, पारदर्शी तथा भयमुक्त वातावरणमा सम्पन्न गराउने उद्देश्यले आचारसंहिता लागू गरिएको हो।

निर्वाचन आयोग ऐन, २०७३ को दफा २२ ले प्रदान गरेको अधिकार प्रयोग गरी आयोगले आवश्यक आचारसंहिता निर्माण गरी कार्यान्वयनमा ल्याएको बताइएको छ।

आचारसंहिता लागू भएसँगै आजै आयोगका पदाधिकारीहरूले मन्त्रिपरिषद्का सदस्य तथा उच्च तहका सरकारी अधिकारीहरूलाई यसबारे औपचारिक जानकारी गराउने कार्यक्रम समेत राखिएको छ।