सरस्वतीको पूजा आराधना गरी हर्षोल्लासका साथ मनाइँदैछ

2 weeks ago

माघ ९गते :होप अनलाईन मिडिया ✍️

प्रत्येक वर्ष माघ शुक्ल पञ्चमीका दिन मनाइने ‘श्रीपञ्चमी’ आज देशभर विद्याकी अधिष्ठात्री देवी सरस्वतीको पूजा आराधना गरी हर्षोल्लासका साथ मनाइँदैछ। ज्ञान, बुद्धि र विवेककी खानीका रूपमा पुजिने सरस्वतीको उपासनाले बौद्धिक विकास हुने जनविश्वास रहेको छ।

विद्यार्थी र बालबालिकाका लागि विशेष दिन

आजको दिनलाई ‘वसन्त पञ्चमी’ पनि भनिन्छ। आज देशभरका सरस्वती मन्दिरहरूमा छात्रछात्रा र श्रद्धालुको बिहानैदेखि घुइँचो लागेको छ। साना बालबालिकाहरूलाई आजकै दिनदेखि ‘अक्षरारम्भ’ (अक्षर चिनारी) गराउने विशेष परम्परा छ। आजका दिन लेखपढ सिकाएमा विद्या प्राप्त हुने धार्मिक मान्यताका कारण विद्यालयहरूमा नयाँ भर्ना र अक्षरारम्भको विशेष रौनक देखिन्छ।

साधक र कलाकारको आस्था

साहित्यकार, कलाकार, पत्रकार र शिक्षकहरूले आफ्ना कलम, कापी, कुची तथा वाद्ययन्त्रलाई सरस्वतीको प्रतीकका रूपमा पूजा गर्ने गर्छन्। सरस्वतीलाई भारती, शारदा, वागीश्वरी र हंशवाहिनी जस्ता विभिन्न नामले पुकारिन्छ। तान्त्रिकहरूले भने आजको दिनलाई तारादेवीको रूपमा तन्त्र सिद्धिका लागि प्रयोग गर्ने गर्छन्।

वसन्त ऋतुको आगमन र सामाजिक महत्व

सूर्य उत्तरतर्फ लाग्ने र दिन लामो हुने क्रमसँगै आजदेखि वसन्त ऋतुको औपचारिक प्रारम्भ भएको मानिन्छ। आजको दिनलाई विवाह, व्रतबन्ध र अन्य माङ्गलिक कार्यका लागि ‘अबूझ साइत’ (बिना साइत शुभकार्य गर्न मिल्ने) मानिए तापनि यस वर्ष शुक्र अस्त भएकाले विवाह र व्रतबन्ध जस्ता ठूला शुभकर्म भने नगरिने पञ्चाङ्ग निर्णायक समितिले जनाएको छ।

हनुमानढोकामा राष्ट्रपतिद्वारा वसन्त श्रवण

यसै अवसरमा आज बिहान हनुमानढोका दरबारको नासल चोकमा विशेष ‘वसन्त श्रवण’ कार्यक्रम सम्पन्न भएको छ। बिहान १०:२७ मिनेटको शुभसाइतमा राष्ट्रपति रामचन्द्र पौडेलले वसन्त श्रवण गर्नुभएको छ। सो समारोहमा उपराष्ट्रपति, प्रधानमन्त्री, मन्त्रीगण र अन्य विशिष्ट व्यक्तित्वहरूको उपस्थिति रहेको थियो। हनुमानढोका हेरचाह अड्डाका अनुसार राष्ट्राध्यक्षले वसन्त श्रवण गर्ने यो वर्षौँदेखिको परम्परा हो।

काठमाडौँका स्वयम्भू, मैतीदेवी, गैरीधारास्थित नीलसरस्वती र ललितपुरको लेले लगायत देशभरका शक्तिपीठहरूमा आज विशेष मेला लागेको छ।