प्रहरी माथि आक्रमण गर्ने दुई जना पक्राउ प्रहरी ले आत्मरक्षाका लागि गोली चलाउँदा एक आक्रमणकारी पनि घाइते

2 days ago

हेटौँडा फागुन २८गते ✍️ होप अनलाईन मिडिया

मकवानपुरको मनहरी गाउँपालिका–१ मकरीमा लागुऔषध सेवनकर्ताहरूको समूहले प्रहरी टोलीमाथि आक्रमण गरेको छ। आक्रमणमा परी एक प्रहरी सहायक निरीक्षक (असनई) घाइते भएका छन् भने प्रहरीले आत्मरक्षाका लागि गोली चलाउँदा एक आक्रमणकारी पनि घाइते भएका छन्।

घटनाको विवरण

गएराति प्रहरी चौकी पदमपोखरीबाट खटिएको टोलीमाथि लागुऔषध सेवन गरिरहेका युवाहरूको समूहले अचानक आक्रमण गरेको थियो। जिल्ला प्रहरी कार्यालय मकवानपुरका प्रहरी नायब उपरीक्षक (DSP) पुष्कर बोगटीका अनुसार, ड्युटीमा रहेका प्रहरी सहायक निरीक्षक दिलबहादुर तामाङमाथि बञ्चरो प्रहार गरिएको थियो।

आक्रमणबाट असनई तामाङ घाइते हुनुभएको छ। स्थिति नियन्त्रण बाहिर जान लागेपछि प्रहरीले आत्मरक्षाका लागि एक राउन्ड गोली चलाएको थियो। प्रहरीको गोली लागेर हेटौँडा उपमहानगरपालिका–१२ हात्तीगौँडा निवासी १९ वर्षीय सनिस घाइते भएका छन्।

उपचार र पक्राउ

घाइते प्रहरी अधिकारी र आक्रमणकारी दुवैको अहिले हेटौँडास्थित सिएमसी चुरेहिल अस्पतालमा उपचार भइरहेको प्रहरीले जनाएको छ।

घटनामा संलग्न रहेको आरोपमा प्रहरीले अन्य दुई जनालाई नियन्त्रणमा लिएको छ। पक्राउ पर्नेहरूमा:

• सञ्जय जिम्बा (२४ वर्ष) – हेटौँडा-१२, हात्तीगौँडा

• अजय थिङ (३५ वर्ष) – हेटौँडा-१२, हात्तीगौँडा

प्रहरीले घटनाबारे थप अनुसन्धान गरिरहेको र पक्राउ परेकाहरूमाथि कानुनी प्रक्रिया अगाडि बढाइने जानकारी दिएको छ।