भारत भ्रमणमा निस्किए परराष्ट्रमन्त्री खनाल, द्विपक्षीय सहकार्य विस्तारमा जोड

14 hours ago

जेठ २२, २०८३✍️ होप अनलाईन मिडिया

नेपालका परराष्ट्रमन्त्री शिशिर खनाल आजदेखि भारतको औपचारिक भ्रमणमा जानुभएको छ । भारतीय विदेशमन्त्री एस जयशङ्कर को मैत्रीपूर्ण निमन्त्रणामा सुरु भएको भ्रमण आइतबारसम्म चल्ने जनाइएको छ ।

परराष्ट्र मन्त्रालयका अनुसार भ्रमणका क्रममा नयाँ दिल्लीमा नेपाल–भारत सम्बन्धका विविध विषयमा उच्चस्तरीय भेटवार्ता हुने कार्यक्रम तय गरिएको छ । विशेषगरी व्यापार, लगानी, ऊर्जा, यातायात सम्पर्क तथा जनस्तरको सम्बन्धलाई थप मजबुत बनाउने विषयमा छलफल केन्द्रित रहने बताइएको छ ।

दुवै देशबीच नियमित रूपमा हुँदै आएको उच्चस्तरीय भ्रमण आदानप्रदानअन्तर्गत यो भ्रमणलाई महत्वपूर्ण रूपमा हेरिएको छ । यसले नेपाल र भारतबीचको बहुआयामिक सम्बन्धलाई अझ प्रगाढ बनाउने अपेक्षा गरिएको सरकारी धारणा छ ।

यसैबीच मन्त्री खनालले सरकार सुशासन, आर्थिक सुधार र दिगो विकासप्रति प्रतिबद्ध रहेको उल्लेख गर्नुभएको छ । नागरिकको बढ्दो अपेक्षा पूरा गर्न सरकार, निजी क्षेत्र, विकास साझेदार तथा सरोकारवाला निकायबीच प्रभावकारी सहकार्य आवश्यक रहेको उहाँको भनाइ छ ।

उहाँले परम्परागत कार्यशैली परिवर्तन गर्दै परिणाममुखी विकासलाई प्राथमिकतामा राखिएको बताउनुभयो । राष्ट्रिय हितलाई केन्द्रमा राख्दै अन्तर्राष्ट्रिय साझेदारीलाई अझ सुदृढ बनाउने नीति सरकारले अघि बढाएको पनि उहाँले स्पष्ट पार्नुभयो ।

परराष्ट्रमन्त्री खनालले क्षेत्रीय तथा अन्तर्राष्ट्रिय मञ्चमा नेपालको आवाज प्रभावकारी रूपमा प्रस्तुत गर्ने प्रयास भइरहेको उल्लेख गर्दै विकास साझेदारीलाई थप व्यवस्थित र उपलब्धिमूलक बनाउनुपर्नेमा जोड दिनुभयो । स्थानीय तहलाई सशक्त बनाउँदै दिगो शान्ति, विकास र समृद्धिका लक्ष्य हासिल गर्न सबै पक्षको साझा प्रयास आवश्यक रहेको उहाँको भनाइ थियो ।