अब जन्म, विवाह, सम्बन्ध विच्छेदलगायतका राष्ट्रिय पञ्जीकरणसम्बन्धी विवरणलाई नागरिक एपमा एकीकृत गर्ने काम सुरु

2 months ago

बैशख ५गते ✍️ होप अनलाईन मिडिया

सरकारले नागरिक सेवालाई डिजिटल माध्यमबाट सहज बनाउने प्रयासलाई तीव्र बनाएको छ। अब जन्म, विवाह, सम्बन्ध विच्छेदलगायतका राष्ट्रिय पञ्जीकरणसम्बन्धी विवरणलाई नागरिक एपमा एकीकृत गर्ने काम सुरु गरिएको छ। सूचना प्रविधि विभागका अनुसार प्रारम्भिक चरणको काम अघि बढिसकेको छ र चाँडै नै यी सेवाहरू कार्यान्वयनमा ल्याइने तयारी भइरहेको छ।

यो प्रणाली लागू भएपछि नागरिकले आवश्यक प्रमाणपत्रहरू सिधै नागरिक एपबाट प्राप्त गर्न सक्नेछन्। साथै, निजामती कर्मचारीको विवरण, लोक सेवा परीक्षाको प्रवेश पत्र तथा वैदेशिक अध्ययनका लागि आवश्यक एनओसी पनि एपमार्फत उपलब्ध गराउने योजना अन्तिम चरणमा पुगेको छ।

सरकारले विभिन्न निकायसँग समन्वय गरी थप सेवाहरू पनि एपमा जोड्ने तयारी गरिरहेको छ। यस पहलले सार्वजनिक सेवा प्रवाहलाई सरल, पारदर्शी र प्रभावकारी बनाउने विश्वास गरिएको छ। डिजिटल प्रणाली विस्तारसँगै नागरिकलाई समय र खर्च दुवै बचत हुने अपेक्षा गरिएको छ।