नेपालमा पर्यटक आगमन बढ्दो, मे महिनामै एक लाखभन्दा बढी विदेशी भित्रिए

14 hours ago

जेठ २१गते ✍️ होप अनलाईन मिडिया

नेपाल मा विदेशी पर्यटक आगमनले उत्साहजनक वृद्धि देखिएको छ । सन् २०२६ को मे महिनामा मात्रै एक लाखभन्दा बढी विदेशी पर्यटक नेपाल भ्रमणमा आएका छन् ।

नेपाल पर्यटन बोर्ड का अनुसार मे महिनामा कुल एक लाख दुई हजार ६२६ विदेशी पर्यटक नेपाल आएका हुन् । यो संख्या गत वर्षको सोही अवधिको तुलनामा करिब १९ प्रतिशतले बढी हो । गत वर्ष मे महिनामा ८६ हजार २१६ विदेशी पर्यटक नेपाल आएका थिए ।

कोरोना महामारीअघि सन् २०१९ को मे महिनामा ७८ हजार ३२९ पर्यटकले नेपाल भ्रमण गरेका थिए । त्यसको तुलनामा अहिलेको आगमन उल्लेखनीय रूपमा बढेको देखिएको छ ।

मे महिनामा नेपाल आउने पर्यटकमध्ये सबैभन्दा धेरै भारतबाट आएका छन् । भारतबाट ४० हजार ७८२ पर्यटक नेपाल आएका छन् भने चीनबाट ११ हजार ५१४, अमेरिकाबाट नौ हजार एक, बंगलादेशबाट पाँच हजार २९८ तथा बेलायतबाट तीन हजार ३७५ पर्यटक नेपाल आएका छन् ।

तथ्यांकअनुसार कुल पर्यटकमध्ये ४७ दशमलव २ प्रतिशत सार्क राष्ट्रका नागरिक रहेका छन् । त्यस्तै अन्य एसियाली मुलुकबाट १९ दशमलव ९ प्रतिशत, युरोपबाट १३ दशमलव १ प्रतिशत, अमेरिका क्षेत्रबाट १० दशमलव ३ प्रतिशत पर्यटक नेपाल आएका छन् ।

पर्यटन बोर्डले अन्तर्राष्ट्रिय परिस्थितिका केही प्रभाव देखिए पनि विश्व बजारमा नेपालप्रतिको आकर्षण बढ्दै गएकाले आगामी महिनामा पर्यटक आगमन अझ बढ्ने अपेक्षा गरेको जनाएको छ ।