एसईई को नतिजा आगामी दुई दिनभित्र सार्वजनिक गर्ने तयारी

1 month ago

बैशाख २७गते ✍️ होप अनलाईन मिडिया

राष्ट्रिय परीक्षा बोर्डले माध्यमिक शिक्षा परीक्षा (एसईई) २०८२ को नतिजा आगामी दुई दिनभित्र सार्वजनिक गर्ने तयारी गरेको जनाएको छ । बोर्डले उत्तरपुस्तिका परीक्षण तथा विवरण प्रविष्टिको अधिकांश काम सम्पन्न भइसकेको र अहिले अन्तिम रुजु तथा प्राविधिक परीक्षण भइरहेको जानकारी दिएको छ ।

परीक्षा नियन्त्रक टुकराज अधिकारीका अनुसार नतिजा प्रकाशनको अन्तिम तयारी भइरहेको छ । उनले नतिजामा कुनै त्रुटि नहोस् भन्ने उद्देश्यले सूचना प्रविधि (आईटी) सम्बन्धी कामलाई विशेष प्राथमिकता दिइएको बताए । आईटीतर्फको काम पूरा भएपछि बोर्ड बैठक बसेर औपचारिक रूपमा नतिजा सार्वजनिक गरिने जनाइएको छ ।

यस वर्ष एसईई परीक्षा चैत १९ गतेदेखि २९ गतेसम्म सञ्चालन भएको थियो । परीक्षा केन्द्रमै उत्तरपुस्तिका परीक्षण गरिएको कारण विगतको तुलनामा नतिजा छिटो प्रकाशन गर्न सम्भव भएको बोर्डको भनाइ छ । शिक्षकहरूको सक्रिय सहभागिताका कारण मूल्यांकन प्रक्रिया प्रभावकारी बनेको अधिकारीले उल्लेख गरेका छन् ।

यसपटक एसईई परीक्षाका लागि कुल ५ लाख १२ हजार ४२१ विद्यार्थीले आवेदन दिएका थिए । तीमध्ये नियमिततर्फ ४ लाख ४१ हजार ५६६ र ग्रेड वृद्धितर्फ ७० हजार ८५५ विद्यार्थी सहभागी भएका थिए । परीक्षार्थीमध्ये २ लाख ५७ हजार ६१३ छात्रा, २ लाख ५४ हजार ८०१ छात्र तथा अन्य ७ जना रहेका छन् ।