आईसीसी क्रिकेट विश्वकप लिग–२ अन्तर्गत आज नेपाल र स्कटल्याण्डबीच प्रतिस्पर्धा हुँदै

3 weeks ago

जेठ ४ गते ✍️ होप अनलाईन मिडिया

आईसीसी क्रिकेट विश्वकप लिग–२ अन्तर्गत आज नेपाल र स्कटल्याण्डबीच प्रतिस्पर्धा हुँदैछ । खेल कीर्तिपुरस्थित त्रिभुवन विश्वविद्यालय अन्तरराष्ट्रिय क्रिकेट मैदानमा बिहान ९ः३० बजेबाट सुरु हुने तय गरिएको छ ।

नेपाल, अमेरिका र स्कटल्याण्ड सहभागी त्रिकोणात्मक शृङ्खलाअन्तर्गत हालसम्म तीन खेल सम्पन्न भइसकेका छन् । स्कटल्याण्डले आफ्ना दुवै खेलमा सफलता हात पार्दै उत्कृष्ट सुरुआत गरेको छ । उसले पहिलो खेलमा नेपाललाई डकवर्थ–लुइस नियमअनुसार दुई रनले हराएको थियो । त्यसपछि अमेरिकाविरुद्ध पनि स्कटल्याण्डले रोमाञ्चक जित निकाल्दै दुई रनकै अन्तरले विजयी बनेको थियो ।

यता नेपालले भने अमेरिकामाथि प्रभावशाली प्रदर्शन गर्दै नौ विकेटको शानदार जित दर्ता गरेको थियो । आजको खेलमा घरेलु टोली नेपाल स्कटल्याण्डसँगको अघिल्लो हारको बदला लिने लक्ष्यमा हुनेछ । साथै, विश्वकप ग्लोबल क्वालिफायरमा पुग्ने सम्भावना कायम राख्न पनि नेपाललाई यो खेल जित्नै पर्ने दबाब रहेको छ ।

हाल लिग–२ को अंक तालिकामा नेपाल सातौँ स्थानमा रहेको छ । नेपालले २६ खेल खेल्दा नौ जित, १५ हार र दुई खेलबाट अंक बाँड्दै कुल २० अंक जोडेको छ । एकदिवसीय मान्यता जोगाउन नेपाल शीर्ष छ स्थानभित्र रहन आवश्यक छ भने ग्लोबल क्वालिफायरको दौडमा टिकिरहन बाँकी सबै खेलमा उत्कृष्ट नतिजा निकाल्नुपर्ने अवस्था छ ।

स्कटल्याण्ड भने तालिकाको शीर्ष स्थानमा मजबुत अवस्थामा रहेको छ । उसले ३० खेलमध्ये १६ खेलमा जित हात पार्दा आठ खेलमा हार बेहोरेको छ भने छ खेल अनिर्णित रहेका छन् । स्कटल्याण्डको खातामा हाल ३८ अंक रहेको छ ।