काभ्रे बस दुर्घटना : सत्यतथ्य पत्ता लगाउन ६ सदस्यीय छानबिन समिति गठन

4 hours ago

जेठ ३० गते ✍🏿 होप अनलाईन मिडिया

काभ्रेको नमोबुद्ध नगरपालिका–२ बुच्चाकोट क्षेत्रमा भएको दुःखद बस दुर्घटनाको वास्तविक कारण पत्ता लगाउन विशेष छानबिन समिति गठन गरिएको छ। दुर्घटनापछि घटनाको निष्पक्ष अनुसन्धान गरी जिम्मेवार पक्ष पहिचान गर्ने उद्देश्यले समिति बनाइएको हो।

प्राप्त जानकारीअनुसार नेपाल प्रहरी प्रदेश कार्यालय काभ्रेका एसएसपी कमल थापाको नेतृत्वमा ६ सदस्यीय समिति गठन गरिएको छ। समितिलाई दुर्घटनाको कारण, सम्भावित कमजोरी तथा जिम्मेवार निकाय वा व्यक्तिको पहिचान गरी विस्तृत प्रतिवेदन सात दिनभित्र पेश गर्न निर्देशन दिइएको छ।

गत शुक्रबार बनेपाबाट रोशी खार्पाचोकतर्फ जाँदै गरेको बा३ख ८३९८ नम्बरको यात्रुवाहक बस बुच्चाकोट क्षेत्रमा सडकबाट करिब ३०० मिटर तल खस्दा भीषण दुर्घटना भएको थियो। दुर्घटनामा आठ जनाले ज्यान गुमाएका थिए भने अन्य १६ जना यात्रु घाइते भएका छन्।

घाइतेहरूको उपचार हाल धुलिखेल अस्पतालमा भइरहेको प्रहरीले जनाएको छ। दुर्घटनापछि स्थानीय प्रशासन, प्रहरी तथा सरोकारवाला निकायहरूले घटनाको गम्भीर अनुसन्धान थालेका छन्। छानबिन समितिको प्रतिवेदनपछि दुर्घटनाको वास्तविक कारण सार्वजनिक हुने अपेक्षा गरिएको छ।