नवनियुक्त गृहमन्त्री सुधन गुरुङ ले पदभार सम्हालेसँगै सबै फाईल खोल्ने भनाई

4 hours ago

जेठ २६ गते ✍🏿 होप अनलाईन मिडिया

नवनियुक्त गृहमन्त्री सुधन गुरुङ ले पदभार सम्हालेसँगै देशमा रोकिएका तथा संवेदनशील अनुसन्धान फाइललाई तीव्र रूपमा अघि बढाइने संकेत दिएका छन् । उनले अब कुनै पनि महत्वपूर्ण अनुसन्धान फाइल थन्किने अवस्था नरहने स्पष्ट पारेका हुन् ।

पदभार ग्रहणपछि सार्वजनिक गरिएको निर्णयअनुसार नेपाल प्रहरीअन्तर्गतको केन्द्रीय अनुसन्धान ब्युरो (सीआईबी)लाई अझ प्रभावकारी र सक्षम बनाइने भएको छ । गृहमन्त्री गुरुङले विशेषगरी आर्थिक अनियमितता, संगठित अपराध तथा गम्भीर प्रकृतिका घटनाको अनुसन्धानलाई प्राथमिकतामा राख्दै प्रक्रियामा रहेका मुद्दालाई छिटो निष्कर्षमा पुर्‍याउन निर्देशन दिने निर्णय गरेका छन् ।

यसका साथै जटिल प्रकृतिका अपराध अनुसन्धानका लागि सीआईबीभित्र विषयगत तथा विशिष्टीकृत टोली गठन गर्ने तयारीसमेत गरिएको छ । यस कदमले ठूला आर्थिक अपराध र संगठित आपराधिक गतिविधिमाथिको अनुसन्धानलाई थप व्यवस्थित बनाउने अपेक्षा गरिएको छ ।

पदभार सम्हाल्ने क्रममा गृहमन्त्री गुरुङले आफ्नो पुनरागमनले केही व्यक्तिलाई उत्साहित बनाएको र केहीलाई असहज महसुस गराएको टिप्पणी गर्दै कानुनको दायरामा सबै विषयलाई निष्पक्ष रूपमा अघि बढाइने बताएका छन् ।

सीआईबी नेपाल प्रहरीको गम्भीर र जटिल अपराध अनुसन्धान गर्ने विशेष निकायका रूपमा परिचित छ ।