दैलेखमा पेट्रोलियम उत्खननको नयाँ तयारी, दोस्रो चरणको सम्झौता हुँदै

जेठ १७गते ✍️ होप अनलाईन मिडिया

खानी तथा भूगर्भ विभाग ले दैलेख क्षेत्रमा पेट्रोलियम उत्पादनको सम्भावना अघि बढाउन दोस्रो चरणको सहकार्यका लागि तयारी थालेको छ। विभागले व्यावसायिक उत्खनन प्रक्रिया अगाडि बढाउन चीनको प्राविधिक टोलीसँग थप सम्झौता गर्ने गृहकार्य गरिरहेको जनाएको हो।

नेपालमा पेट्रोलियम पदार्थको आन्तरिक उत्पादनको सम्भावना अध्ययन गर्न चीन सरकारको प्राविधिक सहयोगमा सञ्चालन भइरहेको परियोजनाअन्तर्गत दैलेखको भैरवी गाउँपालिका–१ जलजले क्षेत्रमा पहिलो चरणको ड्रिलिङ तथा अन्वेषण कार्य पूरा गरिएको छ।

परियोजनामा संलग्न प्राविधिक टोलीले सिस्मिक सर्भे, जियोलोजिकल अध्ययन, म्याग्नेटोटेल्युरिक परीक्षण तथा जियो–केमिकल नमूना संकलनजस्ता विभिन्न अनुसन्धान सम्पन्न गरेको जनाएको छ। प्रारम्भिक परीक्षणबाट पेट्रोलियम पदार्थ र प्राकृतिक ग्यासको सम्भावना देखिएको विभागको भनाइ छ।

अन्वेषण कार्य सफलतापूर्वक अघि बढेमा नेपालले इन्धन आयातमा भइरहेको ठूलो खर्च घटाउन सक्ने अपेक्षा गरिएको छ। साथै, आन्तरिक उत्पादनले आर्थिक विकास, ऊर्जा सुरक्षासहित आयात प्रतिस्थापनमा समेत महत्वपूर्ण योगदान पुर्‍याउने विश्वास गरिएको छ।