ब्राजिल र मोरक्को १–१ गोलको बराबरीमा रोकिए

जेठ ३१गते ✍🏿 होप अनलाईन मिडिया

फिफा विश्वकप २०२६ अन्तर्गत समूह ‘सी’ को रोमाञ्चक खेलमा ब्राजिल र मोरक्को १–१ गोलको बराबरीमा रोकिएका छन्। आइतबार बिहान सम्पन्न खेलमा दुवै टोलीले उत्कृष्ट प्रदर्शन गर्दै एक–एक अंक हात पारेका हुन्।  

खेलको २१औँ मिनेटमा इस्माइल साइबारीले गोल गर्दै मोरक्कोलाई अग्रता दिलाएका थिए। ब्राहिम डियाजको सुन्दर पासलाई सदुपयोग गर्दै उनले टोलीलाई सुरुआती खुशी दिलाए।  

तर ब्राजिलले धेरै बेर दबाबमा बस्नुपरेन। खेलको ३२औँ मिनेटमा भिनिसियस जुनियरले गोल गर्दै खेललाई १–१ को बराबरीमा ल्याए। त्यसपछि दुवै टोलीले जितका लागि लगातार प्रयास गरे पनि थप गोल निस्कन सकेन।  

दोस्रो हाफमा ब्राजिलले बल नियन्त्रणमा राख्दै आक्रमणलाई तीव्र बनायो भने मोरक्कोले अनुशासित रक्षात्मक खेल प्रदर्शन गर्‍यो। दुवै टोलीले केही अवसर सिर्जना गरे पनि निर्णायक गोल गर्न नसक्दा खेल बराबरीमै टुंगियो।  

यस नतिजासँगै समूह ‘सी’ मा ब्राजिल र मोरक्कोले समान एक–एक अंक जोडेका छन्। सोही समूहमा स्कटल्याण्ड र हाइटी पनि रहेका छन्।