सरकारले नयाँ सार्वजनिक सवारी साधन दर्तामा रोक लगाउने निर्णय

17 hours ago

जेठ ८गते ✍️ होप अनलाईन मिडिया

काठमाडौंमा बढ्दो ट्राफिक जाम, वायु प्रदूषण तथा सार्वजनिक यातायात व्यवस्थापनमा देखिएको चुनौतीलाई मध्यनजर गर्दै सरकारले नयाँ सार्वजनिक सवारी साधन दर्तामा रोक लगाउने निर्णय गरेको छ ।

यातायात व्यवस्था विभाग ले बिहीबार सातै प्रदेशका सम्बन्धित निकाय तथा स्थानीय तहलाई परिपत्र पठाउँदै विद्युतीय सवारीसहित कुनै पनि नयाँ सार्वजनिक सवारी साधन दर्ता नगर्न निर्देशन दिएको जनाएको छ ।

विभागका अनुसार सार्वजनिक यातायातको प्रभावकारी व्यवस्थापन हुन नसक्दा दैनिक यात्रु आवागमन प्रभावित हुँदै गएको, सडकमा सवारीको अत्यधिक दबाब बढेको तथा इन्धनको मूल्य निरन्तर उकालो लागेकाले यस्तो निर्णय लिनुपरेको हो ।

यो निर्णय ‘सवारी तथा यातायात व्यवस्था ऐन, २०४९’ को दफा २४ उपदफा (३) अनुसार गरिएको विभागले उल्लेख गरेको छ । उक्त कानुनी व्यवस्थाले वातावरणीय असर, सडकको अवस्था वा सवारी चापका कारण आवश्यक ठानेमा सवारी दर्ता नियन्त्रण गर्न सक्ने अधिकार विभागलाई दिएको छ ।

विभागले सार्वजनिक यातायात प्रणालीलाई थप व्यवस्थित, सुरक्षित र वैज्ञानिक बनाउने उद्देश्यसहित अर्को सूचना जारी नभएसम्मका लागि यो व्यवस्था तत्काल लागू हुने जनाएको छ ।