सिन्धुलीमा रास्वपाको नयाँ नेतृत्व चयन, अविनाश बस्नेत जिल्ला सभापतिमा निर्वाचित

3 hours ago

जेठ २४ गते ✍️ होप अनलाईन मिडिया 

राष्ट्रिय स्वतन्त्र पार्टी को सिन्धुली जिल्ला समितिले प्रथम जिल्ला अधिवेशनमार्फत नयाँ नेतृत्व चयन गरेको छ । नेतृत्वमा सहमति कायम हुन नसकेपछि निर्वाचन प्रक्रियाबाट पदाधिकारी टुंग्याइएको हो ।

शनिबार सम्पन्न मतदानपछि सार्वजनिक मतपरिणामअनुसार अविनाश बस्नेत भारी मतसहित जिल्ला सभापतिमा निर्वाचित भएका छन् । उनले १८१ मत प्राप्त गर्दै प्रतिस्पर्धीहरूलाई पछि पारेका हुन् । उनका निकटतम प्रतिद्वन्द्वी वृखबहादुर बम्जन (अशोक) ले ८८ मत प्राप्त गर्दा अर्का उम्मेदवार कर्णबहादुर कार्कीले ४ मतमा सीमित रहे ।

उपसभापति पदमा रामचन्द्र अधिकारी विजयी बने । उनले १०३ मत प्राप्त गरेका छन् । त्यस्तै, सचिव पदमा लालप्रसाद देवकोटा (एलपी) १८६ मतसहित निर्वाचित भए । सह–सचिवमा दिनेशप्रसाद सापकोटाले १३० मत ल्याउँदै सफलता हासिल गरेका छन् ।

अधिवेशनपछि नवनिर्वाचित नेतृत्वले जिल्लामा पार्टी संगठनलाई थप सक्रिय बनाउने, युवापुस्तालाई राजनीतिमा आकर्षित गर्ने तथा जनतासँग प्रत्यक्ष समन्वय बढाउने प्रतिबद्धता जनाएको छ ।

रास्वपाको जिल्ला अधिवेशनलाई सिन्धुलीमा पार्टीको संगठन विस्तार र आन्तरिक लोकतन्त्र सुदृढ गर्ने महत्वपूर्ण कदमका रूपमा हेरिएको छ ।