काठमाडौँ उपत्यकाका नदी किनारामा फैलिएको अतिक्रमण हटाउने अभियान शनिबार पनि निरन्तर जारी

21 hours ago

बैशाख १९गते ✍️ होप अनलाईन मिडिया

काठमाडौँ उपत्यकाका नदी किनारामा फैलिएको अतिक्रमण हटाउने अभियान शनिबार पनि निरन्तर जारी राखिएको छ। संघीय सरकार र काठमाडौँ महानगरपालिकाको संयुक्त पहलमा आज विशेषगरी कामपा–१६ बालाजु क्षेत्रमा पर्ने विष्णुमति र धोबीखोला नदी किनारका अवैध घरटहरा हटाउने काम भइरहेको छ।

यससँगै कामपा–१५ स्वयम्भू आसपासका क्षेत्रमा पनि अतिक्रमित संरचना हटाउने कार्य अघि बढिरहेको छ। काठमाडौँका सहायक प्रमुख जिल्ला अधिकारी मुक्तिराम रिजालका अनुसार स्वयम्भू, बालाजु–गोङ्गबु बसपार्क, देवीनगरलगायत स्थानमा रहेका अवैध बस्ती हटाउने अभियान निरन्तर सञ्चालनमा रहेको छ।

यसअघि शुक्रबार बल्खु र कालिमाटी क्षेत्रमा नदी किनारमा रहेका जोखिमयुक्त बस्ती हटाइएको थियो। हालसम्म उपत्यकाभित्र सरकारी, सार्वजनिक तथा निजी जग्गा अतिक्रमण गरी निर्माण गरिएका करिब दुई हजारभन्दा बढी घरटहरा हटाइसकिएको जनाइएको छ।

अभियानका क्रममा विस्थापित भएका परिवारलाई अस्थायी रूपमा ‘होल्डिङ सेन्टर’ मा राख्ने व्यवस्था गरिएको छ। सम्बन्धित निकायले नदी किनार संरक्षण, बाढी जोखिम न्यूनीकरण र सार्वजनिक जग्गाको संरक्षणका लागि यस्तो अभियानलाई अझ कडाइका साथ अगाडि बढाउने जनाएको छ।